twitter-with-circle youtube-with-circle instagram-with-circle facebook-with-circle

New Nohay 2021| Meesum Kashmiri | Hamla Hussain a s Ka | Title Noha 2021-1443 | Mola Hussain as Noha

Reciter: Meesum Kashmiri
Poet: Shumaila Erum
Composition: Meesum Kashmiri
Chorus: Own Rizvi & Team
Audio: LAWA STUDIOS
Video: Hussain Productions
Creatives: Ali Haider Graphics 


⚫ ⚫⚫ حملہ حسینؑ کا ⚫⚫⚫


جب کربلا میں گونجی اذانِ بنِ حسینؑ
اٹھا صلات کے لئے زہراؑ کے دل کا چینؑ
اک ایک کر کے جانبِ رن بھیجے نورِ عینؑ
مقتل سجا  کے لاشوں سے بولا نبیؐ   کا  زینؑ

اے ربِّ ذوالجلال!  ترا دیں بچاؤں گا
باطل کا سر اڑانے مَیں مقتل  میں  جاؤں گا


۔۔۔۔۔۔۔


  جونہی لبِ حسینؑ سے الفاظ یہ سنے
اعدا کی جاں نکلنے لگی شہؑ کے خوف سے
موجیں فرات کی لگیں ساحل کو چھوڑنے
اک دوسرے سے ارض و سما بولنے لگے

ہو گا  غضب سے لیس  تجلا حسینؑ کا
قہرِ الٰہی  ڈھائے گا حملہ حسینؑ کا


۔۔۔۔۔۔۔


کیسے بیاں ہو چہرۂ شبیرؑ کا جلال
قرآں کا  لا الٰہَ  کی توقیر  کا جلال
اسلام کے چراغ کی تنویر کا جلال
تقدیرِ حق کا  کاتبِ تقدیر کا جلال

ہر شے پہ خوف طاری ہے لرزاں ہےٹھاٹ باٹ
نو لاکھ کو اتاریں گے سرورؑ  اجل کی گھاٹ


۔۔۔۔۔۔۔


جونہی نکالی رن میں شہِ دیںؑ نے ذوالفقار
بھاگے قضا کے خوف سے بدنسل و بدشعار
اک وار میں ہوئی وہ بہت سوں کے آر پار
روحوں کے ساتھ جسم کئے اُس نے تار تار

خود موت کے ملک کو کہاں وقتِ صبر تھا
میدانِ کربلا نہ تھا میدانِ حشر تھا


۔۔۔۔۔۔۔


مقتل میں چاروں سمت نظر آ رہے تھے سر
طاری تھا خوف موت کا خود فَرقِ موت پر
گھبرا رہے تھے سارے فرشتے یہ سوچ کر
دنیا الٹ نہ دے کہیں کرّار کا پسر

ہرگز اماں ملے گی نہ بزدل کی فوج کو
دوزخ میں ڈالا جائے گا باطل کی فوج کو


۔۔۔۔۔۔۔


آئی صدائے حیدرِ کرّار مرحبا
پیغمبرِ خداؐ کے مددگار مرحبا
زہراؑ پکارِیں اے مرے جیدار مرحبا
وحدت کے فخر نازشِ انوار مرحبا

جب آئی اِرجِعیِ کی صدا آسمان سے
پھر ذوالفقار آئی نہ باہر میان سے


۔۔۔۔۔۔۔


رکھتے ہی تیغ شہؑ پہ لگے ٹوٹنے شقی
اور سیّدہؑ کے لالؑ پہ بےحد جفا ہوئی
تیروں کی نیزوں بھالوں کی برسات شہؑ پہ کی
سبطِ نبیؐ سے زینِ فرس چھوٹنے لگی

آئی ندا فلک سے، شہِ مشرقینؑ کو
یا فاطمہؑ ! سنبھالئے مولا حسینؑ کو


۔۔۔۔۔۔۔


آیا زمیں کی سمت جو زہراؑ کا لاڈلا
تیروں نے روک رکھا تھا جسمِ شہِ ہداؑ
زخموں پہ زخم سہتا رہا ابنِ مرتضٰیؑ
جاری رہا حسینؑ پہ تیروں کا سلسلہ

غلطاں تھا جسم خون میں مُہرِ  جبین تک
پہنچے گزر کے تیروں سے مولاؑ زمین تک


۔۔۔۔۔۔۔


خنجر لئے جو شمر بڑھا جانبِ حسینؑ
سجدے میں تھا رسولِ دو عالمؐ کا نورِ عین
خنجر چلا تو سُن کے سکینہؑ کا شور و شین
مقتل میں گونجے زینبِ دلگیرؑ کے یہ بین

اے ربِّ ذوالجلال! ترا دیں بچا لیا
شاہِ ارمؔ نے تیرے لئے سر کٹا دیا


               شمائلہ ارمؔ